Os seus comezos na escultura son consecuencia dunha evolución da súa intranquilidade artística con respecto á pintura, na que nunca se viu realizado. Despois de coñecer ao escultor Camilo Otero, comeza nel a conciencia de todo o relacionado coa arte e en concreto coa escultura, entendendo esta como elemento vital da alma, crear, dar vida á pedra é o seu soporte diario.

Para este escultor, a sensibilidade do acabado da pedra é un dos máis importantes factores da súa obra, unha obra que nos seus inicios era claramente figurativa e que está evolucionando cara a unha escultura na que os espazos empezan a cobrar protagonismo, debido ao interese e estudo do artista pola obra de escultores máis conceptuais.